हाम्रो बारेमा

ऐतिहासिक पृष्ठभूमि

यो विद्यालय देखतभूली गाविस वडा न.१ स्थित ढक्का राधाकृष्णपुर भन्ने गाँउंमा स्थानिय शिक्षा प्रेमी र समाज सेवी अभिभावक ज्यूहरुको सहयोग र श्री नारायण दत्त भट्ट को नेतृत्वमा सबै गाँउलेहरु मिलेर २०२८ साल माघ १० गते उक्त गाँउको विचमा खुल्ला मैदानमा एउटा सानो झोपडी निर्माण गरि विद्यालय स्थापना गरि श्री सरस्वती प्राथमिक विद्यालय नामाकरण साथ कक्षा १ को पठन पाठन सञ्चालन गरियो । शिक्षक श्री राम सिं भण्डारी र व्यवस्थापनमा श्री नरायण दत्त भट्ट ज्यूको संयूक्त नेतृत्वमा संचालन उक्त विद्यालयलाई २०४१ साल चैत्र १५ गते जिल्ला शिक्षा कार्यालय बाट कक्षा १ को अनुमति प्राप्त भयो भने २०४२ साल चैत्र २४ गते एउटा दरबन्दि सहित कक्षा २ को स्विकृत प्रदान गरियो । यसरी क्रमिक रुपमा अनुमति प्राप्त गरि २०४५ साल चैत्र ९ गते कक्षा ४ र ५ को अनुमति प्राप्त गरि यो विद्यालय कक्षा १ दखि कक्षा ५ सम्म सञ्चालन भई निरन्तर पठन पाठन कार्य चल्दै आएको थियो । २०५८ सालको आरक्ष विस्तार कार्यक्रम अन्तर्गत यो विद्यालय सो उक्त ठाउँबाट बिस्थापित हुन पूग्यो र उक्त ढक्का बस्ती सँगै बसाई सराई भई २०५९ सालमा कालिका गाविस वडा नं.९ अन्तर्गत कटान क्षेत्रमा अध्यक्ष श्री भज्जन राना ज्यू र शिक्षक मेशर राना हरुले कालिका गाविस बाट अनुमति लिएर उक्त ठाँउंमा श्री गणेश प्रा.वि. नामाकरण गरि कक्षा ज्ञ देखि कक्षा ३ सम्म पठन पाठन गरिहेको स्थानमा आईपुग्यो । तत्पश्चात उक्त ठाउंमा सम्पुर्ण अभिभावक मिलेर गणेश प्रा.वि. लाई बन्द गरि श्री भज्जन राना को अध्यक्षतामा यो स्विकृत विद्यालयलाई सञ्चालन गर्न निर्णय गरि उक्त खुल्ला मैदानमा पुःन यो विद्यालय एउटा सानो झोपडीको रुपमा परणित भई सञ्चालनमा आयो र ढक्का गाउ बाट बसाई सराई भई आएको यस बस्ती लाई ढक्का बस्ती र यस विद्यालयलाई यस ठाउंमा पनि ढक्का स्कुल भनेर चिनिन थाल्यो । र २०६६ सालमा यो विद्यालय नि.मा.वि तह कक्षा ६ सञ्चालन गरि निरन्तर कक्षा बढ्दै २०६९ साल सम्म कक्षा वालविकास देखि कक्षा ८ सम्म सञ्चालनको लागि जिल्ला शिक्षा कार्यालय बाट अनुमति प्राप्त गरि हाल सम्म निरन्तर सञ्चालन भैरहेको छ ।

भौगोलीक अवस्था

यो विद्यालयमा कञ्चनपुर जिल्ला पुनर्वास नगरपालिका वडा न.१ स्थित ढक्का गणेशवस्ती भन्ने गाँउमा रहेको जनजाती राना थारु को बाक्लो वस्तिको विचमा अवस्थित छ । यस विद्यालको दक्षिण तर्फ बेलौरी धनगढी हुलाकी सडक, श्री कञ्चन न्यु ब्लुम फिल्ड एकेडेमी र श्री नव युग विद्या निकेतन पर्दछन भने उत्तर तर्फ नकटाबाबा शिव मन्दिर र कालेश्वर आधारभूत विद्यालय भकुण्डा का साथै पुर्व तर्फ श्री रामबुद्ध मा.वि. र श्री जनशक्ती आधारभूत आ.वि. बलभद्रवस्ती र पश्चिम तर्फ बेलौरी नगरपालिका अन्तरगत पर्र्ने श्री सरस्वती माध्यमीक विद्यालय वुटावरी रहेको छ । हाल आएर यस विद्यालमा ३ वटा लेण्टर सहितका पक्की भवन र ३ वटा कर्कट पाता भएका पक्की भवन गरि जम्मा ६ वटा भवन र १५ वटा कोठाहरु छन । जस्मा १ वटा कार्यालय,१वटा कम्प्युटर कोठा र ज्ञ वटा पुुस्तकालय रहेका छन । विद्यालयको हाता भित्र खेल्ने मैदान र उत्तरतिर पर्खाल र २ वटा मुख्य गेट रहेका छन । भौगोलीक दृष्टिकोणले यो विद्यालय दुर्गम छैन ।

विद्यालय रहेको समुदायको बनोट

यो विद्यालय पुनर्वास नगरपालिका वडा न.१ स्थित ढक्का, गणेशबस्ती गाउंमा अवस्थित छ । यो गाउमा जनजाती राना थारु र चौधरी को बाक्लो बस्ती छ । यहां विशेष गरी राना थारु बस्छन भने थारै मात्रामा अन्य जातका मानीसहरु बरोबास गर्दछन । यहंँको घरधुरी १५९० र जनसंख्या महिला ४४९३, पुरुष ४८१७ गरि जम्मा ९३१० रहेको छ । जस्मा वालवालीका देखि वृद्ध सम्म रहेका छन । यस वस्तिमा वसोवास गर्ने मानीसहरु अधिकांश गरिव,अशिक्षित र सामान्य स्तरका रहेका छन । होली,माघी,चराई,तिहार आदि यहां बस्ने राना थारु र चौधरी थारु का मुख्य चाडपर्वहरु हुन । यी जातीका मानीसहरु विभिन्न किसिमका रंग भएका वस्त्रहरु लगाउछन भने पहिलेको तुलनामा आज भोली यस समुदाएका मानीसहरुमा परिवर्तन आएको देखिन्छ । आर्थीक स्थिति बलियो बनाउन यस समुदायका मानीसहरु आजभोली वैदेशिक रोजगारमा समेत गएको देखिन्छन ।